’கடுப்பேத்துறானுங்க மை லார்டு’ - வடிவேல் கோர்ட்டில் பேசும் வசனம் நினைவிலாடியது இதை எழுதும் போது.
நேத்தைக்கு, ஒரு வேலையாக கோவை டவுன் சென்று, வீடு திரும்பும் போது காளம்பாளையம் அருகில் டிராபிக் ஆகி விட்டது. இடது புற சாலையில் பல மினி லாரிகளில் பிள்ளையார் பல வடிவங்களில் தென்பட்டார். பல ரூபங்களில் காணுமிடமெல்லாம் தெரியும் முதற் கடவுளை கண்ணில் கண்ட மாத்திரத்தில் கன்னத்தில் போட்டுக் கொள்ளவில்லை.
லாரிகளைச் சுற்றிலும், பல சிறார்கள் ஆடிக் கொண்டிருந்தனர். அவர்கள் சட்டி போன்ற ஏதோ பல இசைக்கருவிகளை அடித்துக் கொண்டிருந்தனர். டம் டம் சத்தங்கள் எழும்பின.
பல ரூபப்பிள்ளையார்களை தண்ணீருக்குள் தள்ளி அமுக்கப்போகும் இளவட்டங்கள் ஆடிக் கொண்டிருந்தனர்.
பிள்ளையாரைப் போல வேறு எந்தக் கடவுளும் இப்படி மனிதனிடம் சிக்கி அவமானப்படமாட்டார்.
கடவுள் வசிக்கும் கருவறைக்குள் கஜக்முஜக் கூட பரவாயில்லை. யாரும் பார்க்கவில்லை என்றால் பாதகமில்லை. ஆனால் இந்தப் பிள்ளையார் படும் பாடு. வருடம் ஒரு தடவை வச்சு செய்கிறார்கள் பிள்ளையாரை.
நீண்ட தூரம் கார்களும், பேரூந்துகளும் நிறுத்தி வைக்கப்பட்டிருந்தன. நான் வந்த காரும் வரிசையில் நின்று நகர்ந்து கொண்டிருந்தது. பத்து நிமிடம் ஆகியிருக்கும். டிராபிக் விலகுவதாக தெரியவில்லை.
ஒரு காவல்துறை ஜீப் விரைந்து வந்தது. இரண்டு நிமிடங்களில் டிராபிக் இல்லை. டிராபிக் ஜாம் ஆகிடுச்சு பாருங்க மக்களே, பாருங்கன்னு காட்ட வாகனங்களை நிறுத்தி வைத்திருக்கின்றார்கள்.
அடங்கொப்பன் மவன்களா எனக் கேட்கத் தோன்றியது.
எதிரில் கார்கள் தென்படவே இல்லை. காளம்பாளையத்தைக் கடந்து வந்தால் மாதம்பட்டி. மாதம்பட்டி நான்கு சாலை முக்கில் சாலையோரம் ஆண்களும் பெண்களும் இடது புறமாய் நின்று கொண்டிருந்தார்கள். அவர்கள் கையில் பேப்பர் தட்டு. அதில் உதிர்ந்த மஞ்சள் வண்ண பூக்களின் இதழ்கள்.
என்னடா இது என்று பார்த்தால் ஈஷா யோக(??) மைய சற்குரு ஜக்கி அவர்களுக்கு வரவேற்பாம்.
எதுக்கு?
அவர் இமயமலைக்குச் சென்று ஈசனுடன் உறவாடி மீண்டும் வருகிறாராம். அதற்கான வரவேற்பாம். நான்கு ஐந்து இடங்களில் பேனர் வைத்திருந்தார்கள்.
அது என்ன கலரோ தெரியவில்லை - காவியுமில்லாமல், அழுக்குமில்லாத இரு வண்ணங்களில் சட்டை, கால்சட்டை அணிந்து கொண்டு அங்குமிங்கும் திரிந்து கொண்டிருந்தார்கள் பலர். இவர்கள் ஈஷாவின் தொண்டர்கள் எனத் தெரிந்தது. அவ்வப்போது கண்ணில் தென்பட்டிருக்கிறார்கள் ஈஷா யோக மையத்தில். அடியேனும் அடிக்கடி ஈஷாவுக்குள் சென்று வருவதுண்டு.
பலர் கைகளில் கரும் சிவப்பு வண்ணக் கொடி ஒன்றினையும் ஏந்தி இருந்தார்கள். அது என்ன என உற்றுப் பார்த்தால் - Own your day just 7 minutes - புரோகிராம் பற்றிய கொடிகள். ஏழு நிமிடங்களில் உங்களின் நாள் - விளக்கம் சரிதானே?
தீத்திப்பாளையம் அருகிலும், ஆலந்துறையிலும் தோரணங்கள் வேறு கட்டியிருந்தார்கள்.
சற்குரு ஜக்கிக்கு வரவேற்பு களை கட்டியது. மக்கள் மகிழ்ச்சி வெள்ளத்தில் திழைத்துக் கொண்டிருந்தனர். எனக்கும் அந்த மகிழ்ச்சி ஒட்டிக் கொண்டது.
எல்லோரும் ஒரு ஆளை ஆடு ஆடுன்னு கிண்டல் செய்து கொண்டிருக்கிறார்கள். நாமெல்லாம் யாரோன்னு கேட்கத் தோன்றினால், ஓடிப் போய் விடுங்கள். கேள்விகள் கேட்க கூடாது. அது ஆண்டி இந்தியன். மாமி இந்தியன் என்றும் சொல்லலாம். மொழி பெயர்ப்பு சரிதானே?
முன்பு எப்போதோ, காரில் செல்லும் போது பார்த்தேன், சாலையோரமாய் ஒருவர் கையில் ஏதோ ஒரு பாத்திரம் போல ஒரு வஸ்துவை ஏந்திக் கொண்டு சென்றார். கோதையிடம் கேட்டேன்.
அது பிச்சாந்தி புரோகிராமாம். பயிற்சியில் ஒரு பகுதியாம். தினமும் யாரிடமும் யாசகமும் கேட்கக் கூடாதாம், பிச்சை எடுத்து - அதுவும் காசு - அதைக் கொண்டு போய் ஈஷா யோக மையத்தில் கொடுக்க வேண்டுமாம். இப்படி ஒரு பயிற்சி. அவசியம் தானே எல்லோருக்கும்.
இதை எழுதிக் கொண்டிருந்த போது, சிவவாக்கியர் நினைவுக்கு வந்து விட்டார். இந்த மூளை இருக்கிறதே மூளை. சரியான குரங்குப் பயல் புத்தி இதுக்கு. இப்போது எதுக்கு இவர் நினைவுக்கு வர வேண்டும். அதை எழுதி, நீங்கள் படிக்க வேண்டும்? இதெல்லாவற்றையும் யார் கேட்பது?
போனால் போகட்டுமென படித்து வையுங்கள். நாமெல்லாம் நம் மண்டைக்குள் குப்பையைத்தானே சேர்த்து வைக்கிறோம். அதில் இதுவும் ஒரு பக்கமாய் கிடக்கட்டும்.
சித்தமேது சிந்தையேது சீவனேது சித்தரே
சத்தியேது சம்புவேது சாதிபேத மற்றது
முத்தியேது மூலமேது மூலமந்தி ரங்களேது
வித்திலாத வித்திலே யின்னதென் றியம்புமே.
சித்தர், அவதாரம் எனச் சொல்லுபவர்களே, சித்தம் எது? சிந்தனை எது? உயிர் எங்குள்ளது? சத்தி இருப்பிடம் எது? ஈசன் உலாவும் இடம் எது? சாதி பேதம் இல்லாதது எது? முத்தி எது? மூலம் எது? மூல மந்திரங்கள் எது? வித்தே இல்லாமல் வித்தாக இருப்பது எதுவென்று சொல்லுங்களேன்.
உதார் விட்டுக்கிட்டு திரியும் மடச்சாம்பிராணிகளை நம்பி நாசமாய் போவார்கள் என்பதை என்றோ சொல்லி விட்டார் சிவவாக்கியர்.
மனுசனுக பதர்கள் என்பது நிரூபமானது நேற்றைய நிகழ்வில். முட்டாள்களாய் இருப்பதில் அவ்வளவு சுகம் போல மனுசப்பதர்களுக்கு.
30-08-2025
